Shtetet e Bashkuara kanë vendosur sanksione të reja ndaj Koresë së Veriut, duke vënë në shënjestër 10 individë dhe një entitet, të dyshuar për përfshirje në skema që sigurojnë të ardhura për programet bërthamore dhe të raketave balistike të Phenianit.
Sipas Departamentit amerikan të Thesarit, skemat përfshijnë punonjës të teknologjisë së informacionit nga Koreja e Veriut, të cilët sigurojnë në mënyrë mashtruese vende pune në kompani amerikane dhe në vende të tjera, ndërsa një pjesë e madhe e pagave të tyre i kalon regjimit për financimin e armëve të shkatërrimit në masë.
Thesari paralajmëroi se këto rrjete veprojnë përmes sistemit financiar global dhe kërkoi bashkëpunim ndërkombëtar për t’i frenuar. Edhe Australia dhe Bashkimi Evropian kanë vendosur sanksione të lidhura me Korenë e Veriut gjatë këtij muaji. Misioni i Koresë së Veriut në OKB në Nju Jork nuk kishte reaguar menjëherë.
Masat vijnë në një kohë kur presidenti Donald Trump ka shprehur interes për rifillimin e bisedimeve me udhëheqësin Kim Jong Un, por Pheniani ka treguar pak interes për negociata që synojnë kufizimin e programit të tij bërthamor, pas dështimit të takimeve të viteve 2018–2019.
Burimi: TV21
