Erjon Vishkulli, 28-vjeçari nga Elbasani që u plagos me plumb gome në sy gjatë protestës së 24 tetorit në Tiranë, është nisur drejt Italisë për një ndërhyrje kirurgjikale të specializuar.

Gazetarja e Top Channel, Alma Demiraj, bën me dije se i riu është nisur tashmë drejt shtetit fqinj, ndërsa më herët mjekët e Traumës thanë se, pas konsultës së bërë sot në mëngjes, kanë parë disa shenja pozitive, por për një mjekim dhe ndërhyrje më të specializuar është vendosur dërgimi i tij në Itali.

“Me mjekët e Spitalit të Traumës dhe ata të Shërbimit Universitar në QSUT, sot kemi konstatuar disa shenja pozitive. Përsëri, stafi ka arritur në konstatimin se duhet të kryhet edhe një ndërhyrje e dytë për heqjen e trupit në sy. Për një rezultat më të mirë, kemi bërë një bashkëpunim me një klinikë të specializuar në Itali. Ministria e Shëndetësisë është vënë në dispozicion për të kryer transportin e pacientit”, u shpreh mjekja Vilma Mema, shefe e shërbimit të okulistikës në QSUT.

Kjo është nisja FAKTIKE për në Itali — paketa 12:43 e sotme raportonte vetëm planin e nisjes për pasdite (“nisja për në Romë pasditen e sotme”). Zhvillimi i ri këtu është konfirmimi i nisjes plus shenjat pozitive nga konsulta e mëngjesit.

Për plagosjen e të riut ka reaguar edhe kryeministri Edi Rama, përmes një postimi në platformën X. Rama dënon dhunën dhe akuzon organizatorët e saj për nxitje të protestuesve, ndërsa thekson se është angazhuar personalisht për sigurimin e kurimit dhe transportit të të riut drejt Italisë.

“Pasi jam marrë personalisht që mbrëmë me sigurimin e kurimit të djalit në spitalin më të mirë të Italisë, si edhe të transportit me një avion charter mjekësor, u them të gjithë atyre që po e keqpërdorin si të tërbuar syrin e plagosur të tij për të nxitur më tej dhunën: Ju jeni errësira që i mbylli atij djali dritën e syrit!”, shkruan Rama.

“Më vjen shumë keq kur kushdoqoftë lëndohet fizikisht, qoftë edhe një protestues i dhunshëm, por si mund të shmanget çdo lëndim i mundshëm nëse dhuna e dikton natyrën e një proteste?!”, shton kryeministri, i cili thotë se lëndimi i djalit nga Elbasani duhet të jetë “një këmbanë alarmi për të gjithë, po mbi të gjitha për nxitësit e dhunës”.

Ndërkohë, një tjetër e plagosur nga protesta e djeshme ka lënë sot spitalin. Evanthi Pango, 34-vjeçarja e cila u plagos në kokë gjatë protestës, ka lënë ambientet e Spitalit të Traumës. Fatmirësisht, ajo e ka kaluar rrezikun dhe tani do të vijojë kujdesin në shtëpi.

“Ju përshëndes të gjithëve nga Spitali i Traumës. Unë po e lë me përshtypjet më të mira, jo për eksperiencën që kalova, por për kujdesin që pata. Këto eksperienca duhet të na bëjnë më të fortë, më të motivuar dhe mund ta them me siguri që më e motivuar po dal sesa hyra”, është shprehur ajo në një video të postuar në TikTok, teksa largohet nga ambientet e spitalit.

Për dhunën ndaj protestuesve ka reaguar edhe Marjana Koçeku, përmes një postimi në rrjetet sociale. Duke iu referuar edhe rastit të protestuesit të goditur në sy, Koçeku thekson se pushteti vijon ta përdorë frikën si mënyrë për të ushtruar presion ndaj qytetarëve.

“Pushteti vazhdon me e trajtu trupin e qytetarit si vendin ku duhet me u ngulë frika”, shkruan ajo, duke shtuar se çdo goditje ndaj një protestuesi e bën edhe më të qartë arsyen pse njerëzit vijojnë të qëndrojnë në shesh. Sipas Koçekut, dhuna ndaj protestuesve nuk e zbeh arsyen e protestës, por nxjerr edhe më shumë në pah motivet që i mbajnë qytetarët në rrugë.