Ministri i Punëve të Jashtme të Bullgarisë, Velislava Petrova, i kërkoi homologut të saj maqedonas Timço Mucunski një afat kohor konkret në të cilin Maqedonia e Veriut planifikon të përmbushë detyrimet e përcaktuara në Konsensusin Evropian të vitit 2022, të nevojshme për nisjen e negociatave të anëtarësimit me Bashkimin Evropian. Kërkesa u bë gjatë takimit dypalësh në margjinat e Konferencës Ndërkombëtare Ministrore për Korridorin VIII, që u mbajt të enjten në Sofje.

Sipas njoftimit të Ministrisë së Punëve të Jashtme bullgare, të cituar nga Radio Bullgaria, Petrova ripërsëriti mbështetjen e Sofjes për perspektivën evropiane të Republikës së Maqedonisë së Veriut, të bazuar në parimin e meritës. Ajo nënvizoi se një nga detyrimet kryesore të Shkupit është përfshirja e bullgarëve në Kushtetutën e vendit, për të garantuar të drejtat e tyre.

Takimi u organizua me kërkesën e Shkupit, pas vizitës së presidentes së Komisionit Evropian, Ursula von der Leyen, në kryeqytetin maqedonas në fillim të tetorit. Kryeministri Hristijan Mickoski tha se von der Leyen e kishte këshilluar që të përdornin samitin e Korridorit VIII në Sofje për të rifilluar kontaktet me palën bullgare, ndërsa Mucunski kërkoi takimin përmes një note diplomatike dërguar para konferencës.

Mucunski ndërkohë ka ripërsëritur qëndrimin e qeverisë së Shkupit se ndryshimet kushtetuese nuk mund të kalojnë në formën që kërkon korniza evropiane, ndërsa Mickoski ka kërkuar që çdo dialog me Sofjen të zhvillohet me pjesëmarrjen e Bashkimit Evropian, për më shumë parashikueshmëri mbi atë që do të pasojë pas përmbushjes së detyrimeve. Të dyja palët ranë dakord të mbajnë komunikimin të hapur për çështjet me interes të përbashkët.

Konferenca e Korridorit VIII, që lidh Detin Adriatik me Detin e Zi përmes Shqipërisë, Maqedonisë së Veriut dhe Bullgarisë, u hap nga ministrja Petrova me mesazhin se korridori duhet parë si një projekt i vetëm strategjik lidhjeje, e jo si pjesë infrastrukturore të ndara. Në konferencë morën pjesë komisionerja evropiane për Zgjerimin, Marta Kos, përfaqësues të lartë të Shërbimit Evropian për Veprim të Jashtëm dhe të NATO-s, si dhe përfaqësues të Shteteve të Bashkuara, Mbretërisë së Bashkuar dhe Ukrainës.

Ndërkohë, zëvendëspresidentja e Bullgarisë, Iliana Iotova, kishte deklaruar në fillim të tetorit se Sofja mbetet e hapur për bisedime pa ultimatume, por kërkoi që së pari të zgjidhet çështja e Iva Mihaylovës, shtetasja me dy shtetësi që gjykohet në Maqedoninë e Veriut. Një raport i Komisionit Evropian për progresin e Maqedonisë së Veriut pritet të publikohet brenda dy javëve të ardhshme.

Burimi: BNR News