Të paktën gjashtë persona kanë humbur jetën dhe dhjetëra të tjerë janë plagosur në një valë sulmesh me armë zjarri që goditën lagjet e jetës së natës në gjysmë duzinë qytetesh amerikane gjatë fundjavës së Halloween-it, raporton Associated Press.

Dhuna më e rëndë ishte në Dallas, ku katër persona u vranë dhe 15 të tjerë u plagosën në tre sulme të ndara në lagjen Deep Ellum, qendër e muzikës dhe jetës së natës. Shefi i Policisë së Dallasit, Daniel Comeaux, tha se hetuesit ende po përpiqen të përcaktojnë nëse sulmet e së shtunës mbrëma, të ndodhura brenda rreth një ore e 15 minutash, janë të lidhura me njëra-tjetrën.

Në Birmingham të Alabamës, një person u vra dhe tetë të tjerë u plagosën në dy sulme të ndara jashtë stadiumit Legion Field, pas ndeshjes vjetore të futbollit “Magic City Classic”. Në Newark të Delaware, gjashtë persona u qëlluan pranë kampusit të Universitetit të Delaware. Në Bloomington të Illinois, një 19-vjeçare humbi jetën dhe një grua tjetër është në gjendje kritike, ndërsa gjashtë persona të tjerë u plagosën. Në Fayetteville të Arkansas, gjashtë persona u dërguan në spitale me plagë nga armë zjarri.

Edhe dy dyqane Spirit Halloween ishin skena sulmesh: të premten, dy persona u vranë në sulme të ndara në Kaliforni dhe Michigan.