Banka e Shqipërisë ka prezantuar draftin final të Klasifikimit Kombëtar të Aktiviteteve të Gjelbra, një kuadër që përcakton se cilat investime kualifikohen si të qëndrueshme mjedisisht dhe që pritet të ndryshojë mënyrën se si bankat dhe investitorët e drejtojnë kapitalin në ekonomi. Nisma u zhvillua me mbështetjen e Bankës Evropiane të Investimeve (BEI).

Zëvendësguvernatorja e parë e Bankës së Shqipërisë, Natasha Ahmetaj, e cilësoi finalizimin e procesit si një arritje të rëndësishme, duke theksuar se taksonomia e gjelbër do të ndikojë gjithnjë e më shumë në mënyrën se si kanalizim kapitali drejt ekonomisë, por edhe si çështje reputacioni dhe vullneti për të mbështetur qëndrueshmërinë.

Përfaqësuesi i BEI-t në Shqipëri, Alessandro de Concini, tha se ngjarja është një hap i rëndësishëm në zhvillimin e tregut të kapitalit shqiptar, në tërheqjen e investimeve dhe në kthimin e kreditimit të gjelbër në praktikë të zakonshme biznesi. Sipas tij, kjo e afron vendin me standardet e BE-së dhe tregun e saj, duke forcuar dekarbonizimin, konkurrueshmërinë dhe rezistencën klimatike.

Kuadri kombëtar mbulon aktivitete në sektorë si menaxhimi i ujit dhe mbetjeve, ndërtimi, transporti dhe prodhimi, ku vendimet e investimit mund të kenë pasoja afatgjata për mjedisin dhe ekonominë. Bankat do të vlerësojnë gjithnjë e më shumë rreziqet mjedisore dhe klimatike kur marrin vendime kreditimi, ndërsa bizneset do të kenë kritere të qarta për të kuptuar standardet kundrejt të cilave do të vlerësohen propozimet e tyre.

Taksonomia u zhvillua përmes programit të BEI-t për Gjelbërimin e Sistemeve Financiare, në bashkëpunim të ngushtë me institucionet publike, sektorin financiar dhe komunitetin e biznesit shqiptar. Gjatë prezantimit u shpalosën elementët kyç të draftit të tretë dhe final, përfshirë kuadrin e përgjithshëm, kriteret teknike të shqyrtimit dhe rregullimet legjislative.

Burimi: Banka Evropiane e Investimeve