Presidentja e Bankës Qendrore Evropiane, Christine Lagarde, njoftoi të enjten dorëheqjen e saj dhe do të largohet nga posti më 7 shkurt 2027, gati nëntë muaj para përfundimit të mandatit të saj. Lajmi i dha fund muajve të spekulimeve për të ardhmen e saj në krye të institucionit, në një moment të ndërlikuar për Evropën dhe për bankën.
Lagarde njoftoi Këshillin Drejtues dhe presidentin e Këshillit Evropian, António Costa, se do të largohet në atë datë. Costa tha se procesi i përzgjedhjes së pasardhësit do të nisë menjëherë, në mënyrë që udhëheqësit e Bashkimit Evropian të kenë kohë ta zgjedhin pasardhësin para zgjedhjeve presidenciale në Francë, ku sondazhet e nxjerrin favorite kandidates së ekstremit të djathtë, Marine Le Pen.
Si favoritë për ta pasuar përmenden ish-guvernatorët e bankave qendrore të Holandës dhe Spanjës, Klaas Knot dhe Pablo Hernández de Cos. Mandati i Lagardes, që nisi në nëntor 2019 pas drejtimit të Fondit Monetar Ndërkombëtar, duhej të zgjaste deri në tetor 2027. Në të njëjtën ditë, Banka Qendrore Evropiane e mbajti të pandryshuar normën bazë të depozitave në 2,5 për qind.
Burimi: GMA News (Reuters)
