Dhoma Amerikane e Tregtisë në Shqipëri (AmCham) kundërshton rritjen e propozuar të barrës tatimore në Paketën Fiskale 2027 dhe i kërkon qeverisë të rishqyrtojë masat, të publikojë analizat e ndikimit ekonomik e social dhe të zhvillojë konsultime të mirëfillta me komunitetin e biznesit para miratimit të tyre.
Sipas AmCham, ndryshimet e propozuara — mes tyre rritja e tatimit mbi dividendët nga 8% në 15% dhe e normës standarde të TVSH-së nga 20% në 21% — mund të dëmtojnë klimën e biznesit, të frenojnë investimet e huaja, të pakësojnë fondet për riinvestim dhe të rrisin kostot për konsumatorët. Dhoma paralajmëron se rritja e normave, pa shfrytëzuar më parë zgjerimin e bazës tatimore dhe luftën kundër informalitetit, do të dobësojë konkurrueshmërinë e Shqipërisë në rajon.
AmCham kërkon gjithashtu studime dhe modelime të thelluara fiskale, të komunikuara në mënyrë transparente, si dhe periudha të arsyeshme kalimtare, duke theksuar se ndryshimet parashikohen të hyjnë në fuqi nga 1 janari 2027.
Burimi: Top Channel
