Presidenti malazez Jakov Milatović tha sot në Herceg Novi, me rastin e Ditës së Komunës, se rruga evropiane e Malit të Zi nuk duhet shfrytëzuar për të zgjidhur çështje dypalëshe në dëm të interesave shtetërore.
Sipas tij, përgjegjësia për negociatat me Kroacinë i takon plotësisht Qeverisë së Malit të Zi, jo presidentit, dhe ai nuk është i përfshirë në atë proces. Ai kritikoi deklaratat nga Kroacia, sidomos nga ministri i Jashtëm kroat, duke i quajtur jo në frymën e marrëdhënieve të mira dhe kërkoi komunikim ndryshe në periudhën e ardhshme.
Milatović tha se synimi është i qartë: Mali i Zi të bëhet anëtari i ardhshëm i BE-së, me shpresë që marrëveshja e anëtarësimit të nënshkruhet në pranverë ose verë të vitit të ardhshëm. Ai veçoi çështjen e pllakës në Morinje, duke thënë se ishte vendosur në mënyrë të paligjshme dhe se vendimet e mëvonshme shtetërore praktikisht e legalizuan atë veprim. Ai theksoi gjithashtu se demarkacioni në det është i lidhur ngushtë me demarkacionin në tokë dhe se Mali i Zi nuk duhet të dobësojë paraprakisht pozicionin e tij negociues për një arbitrazh të mundshëm.
Burimi: Vijesti
