Nga emigrant pa diplomë universitare te ndërtuesi i një prej superkompjuterëve më të mëdhenj në botë për inteligjencën artificiale. Kjo është historia e Uljan Sharkës, sipërmarrësit me origjinë shqiptare që po sfidon gjigantët globalë të teknologjisë.

Sharka është themelues dhe drejtues ekzekutiv i kompanisë italiane Domyn, të cilën e themeloi në vitin 2016 me emrin iGenius dhe që më vonë u riemërtua. Para se t’i hynte sipërmarrjes, ai ka punuar në Apple dhe ka më shumë se një dekadë përvojë në fushën e inteligjencës artificiale.

Kompania e tij ka siguruar rreth 1.1 miliardë dollarë financim, sipas raportimeve të medias teknologjike, dhe po ndërton në Itali “Colosseum”, një superkompjuter të projektuar për zhvillimin e modeleve gjigante të IA-së. Sipas të dhënave, rreth 90 për qind e financimit është siguruar përmes borxhit, ndërsa pjesa tjetër përmes kapitalit.

“Colosseum” përdor teknologjinë e NVIDIA-s dhe është projektuar për trajnimin e modeleve me më shumë se 1 trilion parametra, duke u renditur ndër infrastrukturat më të fuqishme kompjuterike në Evropë për inteligjencën artificiale.

Ambicia e Sharkës shkon përtej biznesit privat. Në qershor, Komisioni Evropian përzgjodhi konsorciumin EUROPA, të udhëhequr nga Domyn, për projektin “Frontier AI Grand Challenge”. Synimi është krijimi i një modeli evropian të inteligjencës artificiale me burim të hapur, që do të mbështesë 24 gjuhët zyrtare të Bashkimit Evropian.

Projekti shihet si pjesë e përpjekjeve të Evropës për të ndërtuar kapacitete të pavarura në IA dhe për të reduktuar varësinë nga kompanitë amerikane dhe kineze. Domyn zhvillon modele të mëdha gjuhësore dhe sisteme IA që mund të përdoren në infrastrukturën e vetë klientëve, veçanërisht në sektorë ku të dhënat janë sensitive, si financat dhe institucionet e rregulluara.

Në gusht, revista prestigjioze TIME e përfshiu Sharkën në listën TIME100 AI 2026, në kategorinë e inovatorëve, duke e vulosur statusin e tij si një nga figurat më me ndikim në garën globale për inteligjencën artificiale. Një histori suksesi që tregon se talenti shqiptar po shkruan kapituj të rëndësishëm në teknologjinë e së ardhmes.

Burimi: Start News